2016 წლის 4 მარტს, გარდაბნის მუნიციპალიტეტის სოფელ სართიჭალის საზოგადოებრივ ცენტრში, საქართველოს საპატრიარქოს საქველმოქმედო ფონდ „ლაზარეს“ წარმომადგენლებმა ადგილობრივ მოსახლეობასთან საინფორმაციო შეხვედრა გამართეს და სოფლის მეურნეობით დაინტერესებულ პირებს სამომავლო გეგმები და ხედვები გააცნეს. ფონდს ამ მიმართულებით მუშაობის გამოცდილება უკვე აქვს — მათი ხელშეწყობით საგარეჯოს რაიონის სოფელ ნინოწმინდაში პროფესიული კოლეჯი „ფერმერთა სკოლა“ დაარსდა. ფონდი ახალი პროექტის განხორციელებას ამჯერად სართიჭალაში გეგმავს და მომავალ სამოქმედო გეგმაში ადგილობრივი მოსახლეობის აზრსა და ინტერესებს გაითვალისწინებს.
შეხვედრაზე მოსახლეობამ აგრარულ სექტორში არსებულ გამოწვევებზე ისაუბრა. აღინიშნა, რომ რეგიონში სიღარიბის მაღალი დონის ერთ-ერთი მთავარი მიზეზი სოფლის მეურნეობის დაბალი განვითარება და დარგობრივი განათლების ნაკლებობაა. ხშირად ფერმერებმა არ იციან, როგორ გამოიყენონ თუნდაც მაღალხარისხიანი პროდუქტი მაქსიმალური მოგების მისაღებად. მაგალითად, გლეხმა შესაძლოა იცოდეს, რომ მიწას სასუქი სჭირდება, მაგრამ არ ჰქონდეს ინფორმაცია, რომელი სახეობაა ეფექტური და როგორ გამოიყენოს იგი სწორად. შედეგად, სათანადო ცოდნის არარსებობის გამო, მოსავლის რეალიზება და სარგებლის მიღება ვერ ხერხდება.
სართიჭალის მცხოვრებლებმა ხაზი გაუსვეს თანამედროვე საირიგაციო სისტემების, მათ შორის, წვეთოვანი რწყვის დანერგვის აუცილებლობას, რაც მნიშვნელოვნად აამაღლებს მიწის ნაყოფიერებას. მოსახლეობამ ასევე დიდი ინტერესი გამოხატა მეხილეობაში დაბალმოზარდი ჯიშების შპალერებზე გაშენების, ბოსტნეული კულტურებისა და ჩითილების გამოყვანის ახალი ტექნოლოგიების, ასევე მეფუტკრეობის განვითარების მიმართ, სადაც კვლავ ცოდნისა და პრაქტიკული უნარების დეფიციტი იკვეთება.
ფონდის წარმომადგენლებმა აღნიშნეს, რომ პროექტის მთავარი მიზანი სწორედ ადგილობრივთა პროფესიული გადამზადებაა მებოსტნეობის, მეფუტკრეობისა და მესაქონლეობის მიმართულებით. გარდა ამისა, მოსახლეობა საბაზისო დონეზე შეისწავლის მარკეტინგსა და მენეჯმენტს, რაც მათ ბიზნესის სწორად დაგეგმვაში დაეხმარება. შეხვედრაზე მცირე კოოპერატიული მეურნეობების მხარდაჭერის გზებიც განიხილეს, რაც ტექნიკურ დახმარებას — სასოფლო-სამეურნეო ინვენტარის, გაუმჯობესებული სათესლე მასალის, ტექნიკისა და საწყობების უზრუნველყოფას გულისხმობს. ეს ხელს შეუწყობს პროდუქციის მოცულობის ზრდას და ბაზარზე გასვლას გააადვილებს.
შეხვედრისას ყურადღება გამახვილდა ვეტერინარული მომსახურების ხარვეზებზეც. აღინიშნა, რომ სოფლად ნაკლებად ფლობენ ინფორმაციას ცხოველთა დაავადებების შესახებ და ვერ იღებენ კვალიფიციურ კონსულტაციას, რაც აფერხებს მესაქონლეობის დარგის განვითარებას. შეხვედრის დასასრულს მონაწილეები შეთანხმდნენ, რომ სოფლის მეურნეობის განვითარებას მძლავრი სოციალურ-ეკონომიკური ეფექტი ექნება, რაც სასიცოცხლოდ მნიშვნელოვანია ქვეყნის მომავლისთვის.